नेपालीहरूको महान् पर्व बडा दशैं आजदेखि सुरु भएको छ ।
बडा दशैंको पहिलो दिन आज काठमाडौंको हनुमानढोकास्थित दशैं घरमा विधिपूर्वक जमरा राखिएको छ ।
घटस्थापनाका दिन वैदिक विधिअनुसार पूजा गरी जौ, मकै, गहुँलगायत अन्न छरेर जमरा राख्ने प्रचलन छ।
नेपालीहरूले आज घरघरमा विधिपूर्वक दियो, कलश र गणेश स्थापनासहित घटस्थापना गरिन्छ । पूजा कोठा वा दशैं घरमा वैदिक विधिपूर्वक शक्तिकी अधिष्ठात्री देवी दुर्गाको आह्वान गरी पूजा आरम्भ हुन्छ ।
नेपाल पञ्चाङ्ग निर्णायक विकास समितिका अनुसार यो वर्षको घटस्थापनाको साइत बिहान ११ः४७ बजे रहेको छ । आज दिनभरि चित्रा नक्षत्र परेकाले शास्त्रीय वचनअनुसार मध्याह्नकालमा अभिजित् मुहूर्तको साइत घटस्थापनाका लागि दिइएको समितिका अध्यक्ष सहप्राडा पुरुषोत्तम भट्टराईले बताए ।
सम्बन्धित खवर
